NA Asia Mwalim, Zanzibar:
KAMATI ya Tamasha la Kizimkazi (KIZIMKAZI FESTIVAL) imesema kwa mwaka 2025 tamasha hilo linatarajiwa kufanyika Julai 19 hadi 26 katika uwanja wa Suluhu Sport Academy Kizimkazi likiambatana na sherehe za burudani tofauti pamoja na shughuli za kimaendeleo.
Mwenyekiti wa Kamati ya Tamasha hilo, Mahfoudh Said Omar, alitoa taarifa hiyo kwa waandishi wa habari wa vyombo mbali mbali huko hoteli ya Kwanza Kizimkazi, wilaya ya Kusini Unguja.
Alisema katika siku zote nane 8 za tamasha hilo matukio mbalimbali yatafanyika kwa lengo la kutangaza mkoa wa Kusini kiutalii kupitia vivutio vyake vilivyobarikiwa ikiwemo rasilimali ya bahari, utamaduni na sanaa.
Alibainisha kuwa tamasha hilo litaendelea kuwa chachu ya maendeleo ya kijamii na kiutamaduni, kwa kuhamasisha ushiriki wa vijana, vikundi vya sanaa huku likitangaza vivutio vya kipekee vilivyopo Kusini mwa Tanzania.
Mahfoudh alieleza miongoni mwa matukio yatakayofanyika katika siku 8 za tamasha hilo ni dua ya kuliombea taifa amani na utulivu pamoja na viongozi wa wakuu wa nchi.
"Mwaka huu Tamasha la Kizimkazi litakuwa la aina yake kwa lengo la kutangaza utalii unaopatikana eneo la Kusini kwani imebarikiwa vivutio vyingi na vizuri kuliko maeneo mengi, tunawaomba wananchi kutoka mikoa mbali mbali washiriki kujionea" alisema.
Alifahamisha kuwa tamasha hilo litaangazia kwa kina utajiri wa rasilimali ya bahari, utamaduni wa kipekee wa wakazi wa Kusini na sanaa mbalimbali zinazotambulisha utambulisho wa eneo hilo.
"Lengo letu ni kuonyesha uzuri wa Kusini na kuwavutia watalii wa ndani na nje ya nchi kutembelea maeneo haya ambayo yamejaa utajiri mkubwa wa vivutio vya kiasili na kitamaduni," alisema.
Akizungumzia mafanikio yatakayopatikana kwa wananchi wa kizimkazi, alisema ni uwepo wa fursa mbalimbali hasa za kibiashara kwa wajasiriamali, wavuvi na wafugaji kuuza bidhaa zao na hata kuongeza uchumi wa mtu mmoja mmjoa na taifa kiujumla.
“Wananchi wataweza kuuza bidhaa zao mbalimbali, wakiwemo wavuvi, wafugaji, wakulima na wajasiriamali hii ni fursa kubwa ya kiuchumi itakayowawezesha kuongeza kipato chao na kuchangia pato la taifa kupitia sekta ya utalii,” alisema.
Mwenyekiti Mahfoud alibainisha kuwa tamasha hilo litafunguliwa rasmi na Rais wa Zanzibar na Mwenyekiti wa Baraza la Mapinduzi Dk.Hussein Ali Mwinyi Julai 19 mwaka huu.
Nae, Katibu wa Tamasha hilo Hamid Abdul- hamid Khamis alisema tamasha hilo litaanza kwa mafunzo maalum kwa sekta saba ikiwemo wavuvi, wafugaji, utalii na wajasiriamali, ambayo yataanza Julai 12 na yatafungwa na Rais wa Jamuhuri ya Muungano wa Tanzania Dk Samia Suluhu Hassan Julai 20.
Aidha alisema Julai 16 kutakuwa na dua ya kuwaombea viongozi wakuu wa nchi Dk.Samia na Dk. Mwinyi ambayo itafanyika katika viwanja vya Mnazimmoja na dua nyengine ya kuwaombea wakuu wa nchi na wazee waliotangulia mbele ya haki itakayofanyika Julai 18 katika msikiti wa Kizimkazi Dimbani.
Hata hivyo alisema siku hiyo hiyo kutakuwa na kongamano la nishati asilia ambalo litafanyika katika hoteli ya Kwanza Kizimkazi ambalo litatoa fursa juu ya matumizi sahihi ya nishati ya kupikia.
Katibu huyo alisema matukio mengine ni upimaji wa afya, mashindano ya kuhifadhi kuraan yatakayofanyika katika skuli ya sekondari Hasnuu Makame na ufunguzi wa kiwanja cha kufurahishia watoto yatafanyika Julai 24 katika eneo la Kibuteni na baadae kutembelea mabanda ya maonesho ya biashara katika viwanja vya Suluhu Sports Academy.
Hata hivyo alisema Julai 25 Rais wa Jamuhuri ya Muungano wa Tanzania Dk.Samia Sulubu Hassan atafungua skuli ya sekondari Makunduchi na baadae kuzindua hoteli ya Johari.
Sambamba na matukio hayo Dk. Samia Suluhu Hassan anatarajiwa kuwa mgeni rasmi katika kilele cha tamasha hilo la Juali 26 ambae pia ni champion wa nishati safi ulimwenguni.
Mmoja wa wasisi wa Tamasha hilo, Said Hamad Ramadhan, alisema tamasha hilo lina manufaa na kichocheo kikubwa cha maendeleo katika wilaya hiyo, Zanzibar na Tanzania kwa ujumla.
Tamasha hilo linatarajiwa kuwashirikisha wadau mbalimbali wa utalii, wasanii, wanamichezo na vikundi vya utamaduni, likiwa ni jukwaa la kuhamasisha utalii na kuinua uchumi wa jamii za ukanda huo kupitia sekta ya burudani na utalii endelevu linalokwenda sambamba na kauli mbiu ya mwaka 2025 isemayo "Kizimkazi Kumenoga".
0 Comments