ZAMECO Yalaani Vikali Vitendo Vya Udhalilishaji Mtandaoni Na Kusisitiza Maadili Ya Uandishi Wa Habari Zanzibar

 Na Ahmed Abdulla:

Kamati ya Wataalamu wa Masuala ya Habari Zanzibar (ZAMECO) imeibuka na kulaani vikali tukio lililosambaa mitandaoni likiwaonesha wasichana wawili wakirekodiwa na kuulizwa maswali yasiyo na maadili, ya kudhalilisha na kuvunja haki za binadamu.

Video hiyo imeibua hisia kali kutoka kwa wadau wa habari, watetezi wa haki za binadamu, na jamii kwa ujumla, na kusababisha mjadala mzito kuhusu maadili, haki za binadamu, na uhuru wa vyombo vya habari.

Msimamo wa ZAMECO kuhusu Tukio Hilo:

ZAMECO, inayojumuisha taasisi za wanahabari kama Chama cha Waandishi wa Habari Wanawake Tanzania (TAMWA-Zanzibar), Baraza la Habari Tanzania (MCT), Jumuiya ya Waandishi wa Habari za Maendeleo Zanzibar (WAHAMAZA), Jukwaa la Watetezi wa Haki za Binadamu Tanzania (THRDC Zanzibar), Klabu ya Waandishi wa Habari Zanzibar (ZPC) na Klabu ya Waandishi wa Habari Pemba (PPC), imetoa msimamo wake mkali dhidi ya vitendo vya udhalilishaji kwa watoto wa kike na jamii kwa ujumla.

Kamati hiyo inasisitiza kuwa vitendo kama hivyo ni ukiukwaji wa haki za binadamu, vinaharibu maadili ya uandishi wa habari, na kuvuka mipaka ya uhuru wa kujieleza.

 AMECO inasema kuwa uhuru wa vyombo vya habari ni haki inayolindwa kimataifa, lakini haki hiyo inatakiwa iendane na wajibu wa kulinda utu wa kila mtu. Mkataba wa Kimataifa wa Haki za Kiraia na Kisiasa (ICCPR 1996) Ibara ya 19 unasema wazi kwamba "kila mtu ana uhuru wa kutoa taarifa bila ya kuathiri haki za mtu na amani ya nchi." Kauli hii ina maana kuwa, licha ya uhuru wa kutoa habari, kila mwandishi ana wajibu wa kuheshimu haki na utu wa kila mtu, hususan wanawake na vijana ambao mara nyingi wanakumbwa na madhara ya unyanyasaji mtandaoni.

Wito wa ZAMECO kwa Mamlaka na Wadau:

ZAMECO imetoa wito kwa Mamlaka ya Mawasiliano Tanzania (TCRA) na Tume ya Utangazaji Zanzibar kuhakikisha kuwa maudhui yanayorushwa kwenye vyombo vya habari na mitandao ya kijamii yanazingatia maadili na uwajibikaji, ili kulinda jamii dhidi ya maudhui yenye madhara. Kamati pia imetaka kuchukuliwa hatua kali kwa wote waliohusika kutengeneza na kusambaza video hiyo ya udhalilishaji mtandaoni.

Aidha, ZAMECO imeiomba Wizara ya Habari, Utamaduni, Vijana na Michezo Zanzibar kuharakisha upatikanaji wa sheria mpya ya huduma za habari ambayo itasaidia kupunguza changamoto zinazowakabili waandishi, wahariri, na jamii kwa ujumla.

Kwa mujibu wa mapendekezo ya sheria hiyo, ni muhimu kuweka viwango vya kutambua nani ni mwandishi wa habari, sifa zake, na kazi zake kwa ujumla ili kuhakikisha uwajibikaji.

Umuhimu wa Kujenga Uelewa kwa Vijana na Jamii:

Kamati ya ZAMECO pia imehimiza wasichana kujitambua, kujithamini, na kujiwekea malengo thabiti yanayoweza kuwasaidia kujilinda dhidi ya unyanyasaji na udhalilishaji.

Kwa msisitizo huo, ZAMECO inawataka wazazi na walezi kuwaelimisha watoto wao wa kike juu ya haki zao, thamani yao, na nafasi yao muhimu katika jamii. “Ukimuelimisha mtoto wa kike ni sawa na kuielimisha jamii nzima,” walieleza. Kamati pia inashauri kuwa ni muhimu kuwaelimisha vijana wa kiume juu ya umuhimu wa kuwaheshimu watoto wa kike na kujenga mazingira yenye maadili na heshima.

ZAMECO imesisitiza dhamira yake ya kushirikiana na wadau wa sekta ya habari na watetezi wa haki za binadamu ili kuhakikisha kuwa matukio ya udhalilishaji na unyanyasaji wa aina hii hayajirudii tena.

Kamati inasisitiza kwamba kila mwandishi wa habari, mhariri, na mtangazaji anapaswa kutekeleza majukumu yake kwa njia inayolinda heshima na utu wa binadamu na kuzingatia maadili ya uandishi wa habari.

Kwa njia hii, vyombo vya habari vinaweza kuchangia kujenga jamii yenye maadili, inayoheshimu haki za binadamu na inayoongozwa na uwajibikaji kwa manufaa ya wote.