Juhudi za FAWE Zanzibar Katika Kupambana na Ukatili kwa Watoto Zapongezwa na Serikali

Na Ahmed Abdulla, Zanzibar:

Serikali ya Mapinduzi Zanzibar imepongeza juhudi za Jukwaa la Walimu Wanawake wa Kiafrika (FAWE) Zanzibar katika mapambano dhidi ya vitendo vya udhalilishaji na ukatili kwa watoto.

Katika hafla iliyoandaliwa na Jukwaa Walimu Wanawake Wa Kiafrika Upande Wa Zanzibar katika Ukumbi wa Walimu Kiembe Samaki, Afisa Hifadhi ya Jamii kutoka Wizara ya Maendeleo ya Jamii, Jinsia, Wazee na Watoto, Nyezuma Simai Issa, alisema kuwa serikali inatambua na kuthamini mchango wa FAWE Zanzibar katika kutekeleza miradi inayolenga ustawi wa watoto.

"FAWE Zanzibar imekuwa nguzo muhimu katika mapambano haya. Miradi yao inahakikisha watoto wanapata malezi bora na haki zao zinaheshimiwa," alisema Nyezuma Simai Issa, akiongeza kuwa ushirikiano kati ya serikali na FAWE ni muhimu katika kuhakikisha jamii inapata elimu kuhusu haki za watoto na namna ya kuepuka vitendo vya ukatili.

Hafla hii ilikuwa sehemu ya maadhimisho ya siku 16 za kupinga udhalilishaji na ukatili kwa watoto, ambapo wanajamii, walimu, na viongozi wa serikali walishiriki.

Sabrina Omar Abdalla, ni Mjumbe wa Bodi ya FAWE Zanzibar, aliwahimiza wazazi na walezi kuwa na jukumu muhimu katika malezi bora ya watoto.

"Tunawaasa wazazi kuhakikisha watoto wao wanalelewa katika mazingira salama. Malezi bora ni silaha muhimu katika kupambana na vitendo vya udhalilishaji na ukatili," alisema Sabrina.

Kwa upande mwingine, Afisa Programu kutoka FAWE Zanzibar, Habiba Stumai Said, aliwakumbusha wanajamii kuwa mapambano dhidi ya ukatili na udhalilishaji ni jukumu la kila mmoja.

"FAWE Zanzibar inaendelea kushirikiana na jamii na wadau wengine katika kuhakikisha watoto wetu wanapata malezi bora, salama na yenye heshima," alisema Habiba.

Katika maadhimisho hayo, FAWE Zanzibar ilionyesha juhudi zake katika kutoa elimu kuhusu haki za watoto na umuhimu wa malezi bora kwa kuwashirikisha watoto hao katika maonyesho mbalimbali ikiwemo Ngonjera, picha pamoja na uandishi wa insha ambapo juhudi hizi zinahakikisha kuwa watoto wanakua katika familia salama na zinazowalinda dhidi ya vitendo vya udhalilishaji.

Hii ni sehemu ya hatua zinazoendelea kuchukuliwa na serikali na mashirika ya kiraia kama FAWE Zanzibar katika kutokomeza vitendo vya ukatili na kuhakikisha ustawi bora wa watoto.